D
orraantii toddobaadkan ayey aheyd markii madaxweynaha Mareykanka Donald Trump uu sheegay inuu bixiyey amarka duqayn ka dhacday buuraha Calmiskaad ee gobolka Bari.
Duqeyntan oo lala beegsaday maleeshiyaadka ay ciidanka Puntland kula dagaalamayaan buuraha Bari ayaa waxaa ku dhintay mid kamid ahaa sarkaal sare oo kooxda u qaabilsanaa qorshaynta weerarada, sida ay sheegeen milatariga Maraykanka. Inkasta oo la sheegin magaca sarkaalkaas iyo dagaalamayaashii kale ee ku dhintay duqaynta.
Maamulka Puntland ayaa dhankiisa xaqiijiyay in saraakiishaas uu kamid ahaa Cabdiraxmaan Faahiye Ciise Maxamuud oo ahaa ku-xigeenka hogaamiyaha Daacish ee Soomaaliya.
Maamul ayaa sidoo kale sheegay in illaa 40 dagaalame ay ku dhinteen duqayntaasi, kuwaasi oo u badnaa ajaanib ka tirsan kooxda Daacish.
Haddaba, waa kuma Cabdiraxmaan Faahiye?
Nin ayaa 2015-kii kasoo wareegay kooxda Al-Shabaab ee ka dagaalanta bartamaha Soomaaliya. Faahiye iyo madaxda kooxda Daacish ee uu ka midka yahay Cabdulqaadir Muumin ayaa isku xilli ka soo goostay kooxda.
Cabdiraxmaan ayaa waxaa lagu tilmaamay inuu kamid yahay madaxda Daacish-ta Soomaaliya, uuna toos uga amar qaato Cabdulqaadir Muumin oo ah hoggaamiyaha kooxda.
Mareykanka ayaa ku eedeeyay inuu yahay ninka maleegay weerarkii ugu horreeyay ee uu ururkaas ka fuliyay Boosaaso bartimihii 2017, kaasi oo ahaa qarax lagu bartilmaameedsaday bar koontarool boolis, ayna ku dhinteen illaa 5 ruux.
Ninkan ayuu Mareykanka u haystay inuu diyaariyo weerarada ka dhanka ah ganacsatada diidda lacagaha uu ururkaas ku soo rogo.
Cabdiraxmaan ayaa la sheega inuu ku guulaystay in bil qura uu ganacsatada ku qasbo inay bixiyaan lacag dhan 100,000 oo dollar, taasi oo mushaar ahaan loo siiyay dagaal-yahaanada kooxda.
Ninkan ayaa kaalin muhiim ah ugu jiray kooxda saldhigatay buuraha Calmiskaad ee gobolka Bari, taas oo sanadihii dambe lacagihii ugu badnaa oo baad ah ka aruursatay ganacastada.
Maamulka Puntland ayaa haatan dagaal adag kula jira kooxdan, iyadoo bil gudaheed uu howl-galka u gudbay wejigiisi labaad, kaasi oo kooxda looga sifeynayo gebi ahaan deegaanada maamulkaas, gaar ahaan buuraha ay sanadaha gabaadka ka dhigteen.
