![[Deg Deg] Booliiska Gobolka Banaadir iyo Dabley hubeysan oo isku farasaaray dagaal ka dhashay Qaad Koontrabaan ah](https://i0.wp.com/muqdisho.online/wp-content/uploads/2025/02/Breaking.jpg?resize=120%2C86&ssl=1)
Waxaa Somaaliya iyo Imaaraadka gaareen heshiis ku saabsan xalinta dayn dhan 944.8 milyan oo Dirhamka Isutagga Imaaraadka Carabta ah, taas oo u dhiganta $257.3 milyan oo dollar ah. Heshiiskan wuxuu calaamad muhiim ah u yahay horumarka dhaqaale ee Soomaaliya, wuxuuna aas-aas u yahay xasilinta dhaqaalaha guud, kobcinta kalsoonida iyo kor u qaadista horumarka dalkeenna.
Dib-u-habeynta daynta waa dadaal muhiim ah oo ay xukuumaddu wadday, ayuu yiri Wasiirka Maaliyadda Soomaaliya, iyadoo la raacayo istiraatiijiyadda horumarinta dhaqaalaha ee muddada fog. Heshiiskan la gaaray wuxuu yareynayaa culayska daynta Soomaaliya, wuxuuna fursad siinayaa in kheyraadka la heli karo loo weeciyo horumarinta kaabeyaasha dhaqaalaha, adeegyada bulshada, iyo maalgelinta mashaariicda kor u qaadaya kobaca dhaqaale.
Wadahadalada noocan ah iyo heshiisyada la gaaro waxay muujinayaan kalsoonida beesha caalamka ee Soomaaliya iyo sida ay dowladda uga go’an tahay in ay waddada saxda ah u jeexdo dhaqaalaha dalkeenna. Waxaa muhiim ah in dadaalkeennu uu sii socdo si aan u xaqiijinno yoolalka istiraatiijiyadeed ee lagu horumarinayo dhaqaalaha, isla markaana loo hubiyo in mustaqbalka Soomaaliya uu noqdo mid deggan oo koboc leh.
Dowladda Soomaaliya waxay sii wadi doontaa la shaqeynta saaxiibada caalamiga ah iyo hay’adaha maalgelinta si loo sii xoojiyo dadaallada dib-u-habeynta dhaqaalaha, korna loogu qaado fursadaha maalgashi ee dalka. Waxaan u mahadcelinaynaa dhammaan dhinacyadii ka qayb qaatay guushan, gaar ahaan ABUDHABI FUND, doorkooda muhiimka ah ee xalinta arrimaha la xiriira daynta Soomaaliya.
Tallaabadani waa guul kale oo loo qaaday dhanka horumarka dhaqaale, taasoo Soomaaliya u sahlaysa inay hesho fursado dheeraad ah oo lagu xoojiyo maalgashiga iyo kobaca dhaqaale ee shacabka Soomaaliyeed.
