Madaxweynaha Somaliland Cabdiraxmaan Maxamed Cabdillaahi (Cirro), ayaa lagu marti-qaaday in uu ka qayb galo Shir-weynaha Dawladaha Adduunka ee sanadka 2025 oo ka dhici doona Dubai, ma cadda in shirkaan lagu casuumay dowladda federaalka Soomaaliya.
Cirro ayaa maanta ka baxay Hargeysa, isagoo u safray dalka Imaaraadka, halkaas oo lagu marti qaaday shir Dubai ka dhici doona 11-ka ilaa 13-ka bishaan, tallaabadaan ayaa halis geli karta xiriirka dowladda federaalka Soomaaliya iyo dowladda Imaaraadka Carabta.
Xuseen Cabdullahi oo ah Afhayeenka Madaxweynaha Somaliland ayaa warbaahinta u sheegay in shirkaas ay ka soo qeyb galayaan inta badan madaxda dowladaha caalamka.
“Madaxweynaha Somaliland wuxuu shirkaas ka jeedi doonaa khudbad taariikhi ah, isagoo dul istaagi doona geedi socodka iyo hormarka iyo guulaha ay Somaliland ka gaartay dhinacyo badan oo saameyn ku leh gobolka Geeska Afrika,” ayuu yiri Afhayeenka Madaxweynaha Somaliland.
Sidoo kale wuxuu sheegay in shirkaan lagu casuumay Madaxweyne Cirro uu muujinayo doorka ay Somaliland ku leedahay Geeska Afrika iyo mudnaanta isisoo tareysa ee caalamku siinayo.
Afhayeenka Madaxweynaha Somaliland ayaa faahfaahin ka bixiyey ajendayaasha shirkaas isagoo sheegay in shirkani uu muhiim u yahay caalamka, Somaliland-na ay Sharaf gaar ah u tahay in lagu casuumo.
“Tan iyo markii la aas-aasay 2013-kii shirweynahaan waxaa hoggaaminayey Sheekh Maxamed Bin Raashid-ka Imaaraadka, wuxuuna noqday madal caalami ah oo lagu gorfeeyo siyasadaha caalamka,” ayuu yiri.
Ma cadda in shirweynahaan lagu casuumay dowladda federaalka Soomaaliya, balse arrintaan ayaa xad-gudub ku ah madax-banaanida Soomaaliya, waxaana suurtagal ah in talaabadaan ay dhaawacdo xiriirka Soomaaliya iyo Imaaraadka Carabta.
