Dagaal u dhaxeeya Ciidamada Dowlad-Goboleedka Puntland iyo Kooxda Daacish ayaa ka socda dusha sare ee Tog-Jaceyl Calmiskaad buuraleyda Gobolka Bari, waxaa lasoo wariyay la maqlay duqeyn culus oo ka socda goobaha furimaha dagaalka ah.
Sida ay sheegeen ilo kala duwan, diyaaradaha dagaalka Maraykanka ayaa duqeymo culus ka fuliyay agagaarka buurta Tog-Jaceyl oo saldhig iyo difaacyo ku leeyihiin xubno katirsan Daacish oo dagaal kala soo horjeeda Ciidamada Puntland.
Saraakiisha hoggaaminaya Ciidamada ammaanka Puntland ee howlgalka ku jira ayaa sheegay in ujeedkoodu yahay sidii ay u gaari lahaayeen dhulka buuraha ah ee sidii silsiladaha oo kale isugu xiran si ay uga dejiyaan xubnaha Daacish.
Diyaaradaha aan duuliyaha lahayn ee Drones-ka ayay Daacish u adeegsaneysaa dagaalkaan iyada oo la sheegay in ay kusoo xireen walxaha qarxa, Dowlad-Goboleedka Puntland ayaa shaacisay in ciidamadeeda ay soo rideen diyaaradaas qaarkood.
Dhanka kale, askar iyo saraakiil dhaawac soo gaaray ayaa loo qaaday Magaalada Garoowe Xarunta Dowlad-Goboleedka Puntland, qaar kale ayaa diyaarad gaar ah loo diyaariyay si daryeel caafimaad oo dibadda ah loogu helo.
La soco wixii kasoo kordha
