![[Deg Deg] Booliiska Gobolka Banaadir iyo Dabley hubeysan oo isku farasaaray dagaal ka dhashay Qaad Koontrabaan ah](https://i0.wp.com/muqdisho.online/wp-content/uploads/2025/02/Breaking.jpg?fit=480%2C360&ssl=1)
Dagaalka ayaa goor dhaweyd ka qarxay magaalada Muqdisho, kadib markii dooman sida qaad koontrabaan ah ay la wareegeen maleeshiyaad hubeysan, kuwaas oo dhacay qaadka la sheegay inuu ahaa mid si sharci darro ah loo keenay. Sida ilo wareedyo lagu kalsoon yahay ay MOL u sheegeen, qaadkaasi waxaa lahaa Taliyaha Booliiska Gobolka Banaadir, Macallin Mahdi.
Macallin Mahdi ayaa isku dayay inuu xoog ku soo ceshto qaadkiisa, isagoo adeegsanaya ciidamo booliis ah oo ka amar qaata. Laakiin, markii ay booliisku isku dayeen inay qaadka dib u helaan, waxaa halkaas ka dhashay dagaal culus oo dhex maray labada dhinac. Rasaas culus ayaa la is dhaafsaday, taasoo keentay dhimasho iyo dhaawac oo soo gaaray askar ka tirsan booliiska.
Sida ay MOL u xaqiijiyeen dad goobjoogayaal ah, dagaalku waxa uu si gaar ah uga dhacay xaafado ku dhow degmada Cabdicasiis, halkaas oo doonyaha qaadka lagu soo dajiyay. Maleeshiyadu waxay ahaayeen kuwo si aad ah u hubeysan, iyaga oo heystay hub culus iyo gaadiid dagaal, taasoo keentay in booliisku waayaan awood ay kula tacaalaan iska caabbinta adag.
Markii dagaalku sii xoogeystay, booliisku waxay u yeerteen gurmad dheeraad ah, waxaana goobta soo gaaray ciidamo kale oo ka tirsan dowladda, kuwaas oo isku dayay inay kala dhex galaan labada dhinac. Laakiin, dagaalku waxa uu sii socday muddo saacado ah.
Xaaladda magaalada ayaa noqotay mid kacsan, iyadoo dadweynuhu ay cabsi weyn ka muujiyeen in dagaalka uu ku faafo xaafado kale. Dad badan ayaa ka cararay guryahooda, iyagoo ka baqaya in lagu waxyeelleeyo dagaalka. Wararka hordhaca ah waxay sheegayaan in ay jiraan dhimasho iyo dhaawacyo badan, inkasta oo aan weli si rasmi ah loo xaqiijin tirada saxda ah.
Dadka reer Muqdisho ayaa walaac ka muujinaya in dagaallada noocan oo kale ah ay caadi ka noqdaan magaalada, taasoo wiiqi karta xasilloonida iyo ganacsiga caasimadda. Waxaa la filayaa in dowladda ay qaadi doonto tallaabooyin adag si loo xakameeyo falalka noocaan ah mustaqbalka.
