Wasiirka Tamarta iyo Khayraadka Dabiiciga ah ee Turkiga, Alparslan Bayraktar, ayaa maanta oo Jimce ah shaaciyay in markabka sahminta shidaalka ee Oruc Reis uu dhameystiray 50% baaritaannada shidaalka ee badda Soomaaliya, sida ay ku warrantay wakaaladda wararka Anadolu.
Markabka Oruc Reis ayaa bishii Oktoobar ee sanadkii hore yimid dekedda Muqdisho si uu u billaabo hawlgal sahmin ah oo lagu baarayo saliidda iyo gaaska dabiiciga ah ee xeebaha Soomaaliya. Sahminta ayaa la filayaa in ay socoto muddo lix ilaa toddoba bilood ah, waxaana lagu sameynayaa daraasado saddex-cabbir (3D) ah oo dhanka ciidda ah si loo helo xog muhiim ah oo gacan ka geysan doonta aqoonsiga goobaha saliidda iyo gaaska dabiiciga ah.
Wasiirka Tamarta ee Turkiga, Alparslan Bayraktar, ayaa magaalada Istanbul kula kulmay Wasiirka cusub ee Batroolka iyo Macdanta Soomaaliya, Daahir Shire Maxamed, iyo wafdi uu hoggaaminayay. Kulankaas kadib, Wasiir Bayraktar ayaa sheegay in labada dal ay ka wada hadleen wejiga xiga ee hawlgallada sahminta iyo fursadaha iskaashi ee cusub ee la horumarin karo.
Bayraktar waxa uu sidoo kale xusay in Turkiga iyo Soomaaliya ay bilaabeen geeddi-socod cusub oo iskaashi dhanka macdanta ah, taasoo sii xoojinaysa xiriirka istiraatiijiga ah ee labada dal. “Waxaan sii wadi doonnaa dadaallada aan ugu jirno inaan gaarsiino iskaashigeenna tamarta iyo macdanta heer ka tarjumaya xiriirka dhow ee daacadda ah ee ka dhaxeeya dalalkeenna,” ayuu yiri Wasiir Bayraktar.
Xogta laga ururiyo sahminta ayaa lagu falanqeyn doonaa caasimadda Turkiga ee Ankara, si loo aqoonsado goobaha ugu habboon ee lagu sameyn karo qodista shidaalka iyo gaaska.
Wasaaradda Tamarta ee Turkiga ayaa sheegtay in markabka Oruc Reis uu sahmin ka wado qiyaastii 5,000 km oo isku wareeg ah. Waxaa sidoo kale la socda laba markab oo kuwa dagaalka ah, kuwaas oo sugaya amniga markabka sahminta.
Wasiir Bayraktar ayaa intaa ku daray in shirkadda Turkish Petroleum ay haysato shati sahmin oo loogu talagalay saddex aag oo ku fadhiya dhul-badeed dhan 15,000 km oo isku wareeg ah.
