Madaxweynayaasha Maamullada Jubaland iyo Puntland oo maanta heshiis ku gaaray magaalada Garoowe ayaa ogolaaday in hanaan doorasho qof iyo cod ah lagu qabto doorashada dowladaha hoose ee maamullada.
“Si loo daadajiyo xukunka, loona hirgaliyo hannaan dimuqraadiya ah sida uu qabo Dastuurka KMG ah iyo dastuurada Dowladaha xubnaha ka ah DFS. Shirku wuxuu ugu baaqayaa dowladda aan wali qaban doorashooyinka dowladaha hoose in ay qabtaan doorashooyinka goleyaasha deegaanka ee tooska ah, ayna magacaawdaan guddiyada doorashooyinka qof iyo codka ah sida Puntland,” ayaa lagu yiri war-murtiyeed ay si wadajir ah usoo saareen Madaxweynayaasha labada maamul.
Sidoo kale waxaa lagu yiri qoraalka “Shirku wuxuu ugu baaqayaa Dowladda kale ee Xubnaha ka ah Dowladda Federaalka ah in ay qabtaan doorashooyinka Goleyaasha Wakiilada iyo Madaxweynayaasha, ayna magacaawdaan guddiyada doorashada heerkooda si waafaqsan qawaaniintooda doorashada.”
Puntland ayaa dhankeeda sheegtay inay diyaar u tahay in ay gacan ka siiyo maamulada kale hirgalinta hannaanaka doorashooyinka qof iyo codka ah, gaar ahaan dhinacyada khibradda iyo shuruucda doorashooyinka.
Sidoo kale, labada hoggaamiye ayaa mowqif adag ka qaatay dowladda dhexe, iyagoo si cad u sheegay in aanay ku metalin go’aannada masiiriga ah ee la gaarayo, maadaama aanay qayb ka ahayn oo ay mar hore xiriirka u jareen Villa Somalia.
“Dowladaha Jubaland iyo Puntland waxay ku heshiyeen in ay u midoobaan, meelna ay uga soo wada jeestaan sidii ay Soomaaliya u gaari lahayd dowladnimo dhammeystiran oo ku dhisan hannaanka federaaliga ah, dimuquraadi ah oo nabadna ah,” ayaa lagu yiri bayaanka.
Si kastaba, labada maamul ayaa haatan dib u midoobay, iyagoo ku heshiiyay in meel uga soo wada jeestaan sidii ay Soomaaliya u gaari lahayd isku filnaan iyo in la helo hannaan lagu xoojinayo nidaamka federaalka ee dalka.
