Guddoomiyaha Gobolka Banaadir ahna Duqa Muqdisho Maxamed Axmed Amir mar kale ku celiyay baaqiisa ku aaddan in Gobolka Banaadir uu helo maqaam maamul goboleed, islamarkaana la siiyo 21 xubnood oo metelaya golaha shacabka ee Baarlamaanka Federaalka Soomaaliya.
Guddoomiyaha ayaa sheegay in ay muhiim tahay in dadka ku dhaqan magaalada Muqdisho ay helaan matalaad cadaalad ah oo la mid ah kuwa maamul goboleedyada kale ee dalka ka jira. Wuxuu xusay in Muqdisho ay tahay caasimadda dalka, islamarkaana ay tahay halka ugu dadka badan, taasoo keentay baahida loo qabo in ay hesho xuquuq siyaasadeed oo waafaqsan dastuurka.
“Muqdisho waa caasimadda dalka, waa hoyga dowladda federaalka, waa halka ay ka dhacaan dhammaan howlaha dowladda, haddana waxay ka maqan tahay metelaad sax ah oo ay ku yeelato baarlamaanka. Maamul goboleedyada kale waxay leeyihiin xubno metelaya, sababta Muqdisho looga reebayo ma cadda. Waa in Baarlamaanku ansixiyo xuquuqda shacabka Muqdisho si ay uga mid noqdaan nidaamka siyaasadeed ee dalka, “ayuu yiri Guddoomiyaha.
Wuxuu intaas ku daray in arrintan aysan ahayn mid siyaasadeed oo lagu murmi karo balse ay tahay xaq aasaasi ah oo ay dadweynaha Muqdisho leeyihiin. “Dadku waxay bixiyaan canshuur, waxay taageeraan dowladda, waxayna u baahan yihiin in codkooda la maqlo. Waa lagama maarmaan in Baarlamaanka uu qaato go’aan cadaalad ah oo Muqdisho siinaya xuquuqdeeda,” ayuu hadalkiisa ku daray.
Si kastaba ha ahaatee, doodda la xiriirta maqaamka Gobolka Banaadir ayaa muddo dheer taagneyd, waxaana jira aragtiyo kala duwan oo ku saabsan sida loo wajahayo. Xildhibaano ka tirsan Baarlamaanka ayaa horey uga hadlay suurtagalnimada in Muqdisho hesho maamul goboleed rasmi ah, halka kuwo kalena ay ku doodayaan in caasimaddu ay leedahay maqaam gaar ah oo ka duwan maamul goboleedyada kale.
Guddoomiyaha Gobolka Banaadir ayaa ugu dambeyn ugu baaqay xildhibaannada Baarlamaanka Federaalka Soomaaliya in ay qaataan go’aan taariikhi ah oo siisa Muqdisho matalaad sax ah. Wuxuu xusay in arrintani ay muhiim u tahay cadaaladda, hannaanka federaalka, iyo horumarka siyaasadeed ee dalka.
Arrintan ayaa la filayaa in ay noqoto mid dood badan dhalisa, iyadoo bulshada Muqdisho iyo siyaasiyiinta Soomaaliyeed ay si weyn u danaynayaan natiijada kasoo baxda go’aanka Baarlamaanka.
