Tigray oo ku hanjabtay in ay duqeyn doonaan Casmara & Musawac

Reading Time: < 1 minute

Hoggaamiyayaasha gobolka Tigray-ga dalka Ethiopia ayaa ku hanjabay inay weerari doonaan Eritrea, ayaga oo sidoo kale sheegtay weeraro lagu qaaday garoomo diyaaradeed oo ku yaalla gobolka Amxaarada.

Weerarada lagu qaaday garoomada – iyo hanjabaad la xiriirta kuwa kale oo dheeri ah oo soo socda – ayaa sare u qaaday walaaca laga qabo in dagaalka uu saameeyo gobolka oo dhan, xilli Abiy uu sheegay inuu yahay mid kooban oo ujeedo kooban laga leeyahay.

Weerarada oo dhacay habeenkii Jimcaha ayaa lala beegsaday labada magaalo ee Bahir Dar iyo Gondar ee gobolka Amxaarada oo deris la ah kan Tigray-ga.

Dowladda federaalka Ethiopia ayaa qiratay in garoomada diyaaradeed ay gaareen waxyeelooyin, halka dhaqtar ku sugan magaalada Gondar uu sheegay in laba askari lagu dilay 15 kalena lagu dhaawacay.

“Xalay, waxaan waxyeello xun gaarsiinay goobo militari oo ku yaalla garoomada diyaaradaha Gonadr iyo Bahir Dar,” waxaa sidaas yiri Getachew Reda oo ah xubin sare oo ka tirsan ururka TPLF ee Tigray-ga oo maanta bayaan soo saaray.

Waxa uu sidoo kale ku celiyey war horey uga soo baxay TPLF oo ay ku sheegeen in askar Eritrean-ah ay ku lug leeyihiin dagaalka, taasi oo Ethiopia ay beenisay.

Getachew ayaa ku hanjabay in TPLF aysan ka laba labeyn doonin inay weerarto goobo ku yaalla gudaha Eritrea, oo ay ku jirto caasimadda Asmara.

“Haddii ay weerar nooga soo qaadaan Asmara ama Bahir Dar, waxaa naga go’an inaan qaadno tallaabooyin aargudasho ah. Waxaan gantaallo la beegsan doonnaa goobo cayiman, oo dheeri ku ah garoomada diyaaradaha,” ayuu yiri Getachew Reda.

“Waxaan weerar gantaallo ah ku qaadi doonnaa magaalada Asmara iyo Massawa, si aan u fashilino dhaq-dhaqaaqyada militari.”

Abiy Ahmed ayaa Jimcihii sheegay in TPLF ay qarka u saaran yihiin in laga adkaado, hase yeeshee kooxdan ayaa wacad ku maray inay sii dagaalami doonaan.