MW Deni oo kala tashaday waxgaradka Puntland go’aanada uu la tagayo Dh/Mareeb

Reading Time: < 1 minute

Madaxweynaha Puntland Siciid Cabdullaahi Deni ayaa xalay Kulan Wada-tashi ah oo ku saabsan Arrimaha Siyaasadeed ee Soomaaliya wuxu la yeeshay siyaasiyiinta iyo Bulshada Rayidka ah ee Puntland. Kulanka ayaa ujeedadiisu ahayd in uu helo talo la isku waafaqsan yahay uu la tago DHuusameeb.

Kulanka oo ka dhacay xarunta Madaxtooyada waxa ka qayb-galay Siyaasiyiin Aqoonyahanno  iyo Ururada Bulshada Rayidka Puntland waxaana si gaar ah looga hadlay Arrimaha Doorashada Soomaaliya. Waxaana si buuxda loogu lafaguray go’aanada uu la tagayo shirkaas MW Deni iyo jawaabaha uu ka bixin doono xujoojinka uu la imaan doono MW Farmaajo.

Qoraal kooban oo laga soo saaray Madaxtooyada Puntland ayaa lagu sheegay in kulankaas uu is xog-wareysi iyo Wada-tashi ahaa loogana hadlayay xaaladda dalku marayo.

“Madaxweynaha Dowladda Puntland Mudane Siciid Cabdullaahi Deni, ayaa caawa kulan xog wareysi iyo wadatashi isugu jira oo ku saabsan xaaladda Dalku marayo la yeeshay qeybaha kala duwan ee Masuuliyiinta, Siyaasiyiinta, Aqoonyahannada , Waxgaradka iyo Ururada Bulshada ee Puntland.”

Ka qaybgalaayaasha shirkaas ayaa MOL u xaqiijiyay in ugu danbeyntii lagula taliyay MW Deni in uusan marnaba ka ogolaan Farmaajo in qaranimada iyo dowladnimda Soomaaliya uu god dheer ku duugo isla markaana ayan Puntland ka tanaasulin sadaxda qodob ee horyaala shirka Dhuusamareeb.