Maxaa ka jira in askar ka tirsan ciidamada ATMIS lagu dilay Xalane dhexdiisa?

Reading Time: < 1 minute

Sida ay sheegayaan warar aan la shaacinin, Askari ka tirsan ciidamada sida gaarka ah u tababaran ee loo yaqaano (SFC) ee nabad ilaalinta u jooga Soomaaliya, ayaa la sheegay in uu toogasho ku dilay saddex askari oo ay wada shaqaynayeen ka hor inta aan la xirin.

Sida uu sheegay askari ka tirsan ATMIS oo ka gaabsaday in magaciisa la baahiyo,  falkaan ayaa  dhacay maalintii shalay oo isniin ahayd, waxa uuna  ka dhacay afafka hore ee Saldhigga Xalane ee taliska ATMIS.

Ilahaan  yidhi: Eedeysanaha, ayaa fiidnimadii isniinta isku dhaceen saaxiibkiis Lance Corporal. Abbaaro 5:45 subaxnimo, ayuu saaxiibkiis toogtay. “Markii uu ku soo laabanayay booskiisii, wuxuu la kulmay nin kale oo ay wada shaqaynayeen, wuuna toogtay. Askari kale oo u soo baxay inuu arko waxa dhacaya isagana waa toogtay,” ayuu yiri ilo-wareedka.

Warku wuxuu intaa ku darayaa in askariga ay rasaasta ka dhammaatay, isla markaana askari kale oo ka ag dhawaa uu qabtay. Afhayeenka ciidamada difaaca dalka Uganda, UPDF Brig Gen Felix Kulaigye ayaa markii hore ka gaabsaday inuu ka hadlo arrintan, laakiin Markii dambe ayuu xaqiijiyay dhacdada, isagoo sheegay in askariga la maxkamadeyn doono.

Ma uusan carabaabin dadka la dilay, wuxuuna sheegay in ilaa hadda aan la xaqiijin sababta ka dambeysay toogashada.