Mareykanka oo aqoonsaday Axmed Madoobe, caadaadisna saaraya Farmaajo

Reading Time: 2 minutes

Sida diblomaasiyiinta beesha caalamka laga soo xigtay, waxaa jira cadaadis dowada Mareykanka, gaar ahaan safiirka u fadhiya Soomaaliya Donald Yamamoto uu ku saarayo Madaxweyne Farmaajo inuu la shaqeeyo maamulka Jubaland, ee uu hogaamiyo Axmed Madoobe.

Cadaadiskaan ayaa xoogeystey wixii ka dambeeyay markii safaarada Mareykanka aqoonsatey natiijadii ka soo baxdey doorashadii madaxtinimada Galmudug taasoo uu ku guuleystay Axmed Cabdi Kaariye [Qoor-Qoor], oo horey uga mid noqday xukuumadda Khayre, oo uu ka ahaa wasiiru dowlaha wasaaradda howlgalaha guud.

Axmed Qoor Qoor aya lagu eedeeyay musuqmaasuqii ugu weynaa intii aha maareeye ku xigeenka dekedda Muqdisho. Warbixintii ay qortay Qaramada Midoobay aya lagu sheegay in Axmed Qoor Qoor uu lunsaday malaayiin doollar. Waxaa la yaab ku noqotay shacabka Soomaaliyeed iyo qaar ka mid ah diblomaasiyiinta beesha caalamka sida uu Donald Yamamoto u taageeray doorashada Axmed Qoor Qoor.

Ambassador Yamamoto, safiirka Mareykanka ayaa taageeridiisa doorashadda Galmudug kala kulmey eedeymo uga yimid siyaasiyiinta ka soo jeeda degaanada Galmudug iyo xisbiyadda siyaasadeed ee dalka.

Dowlada Mareykanka oo diirada ku haysa la dagaalanka Al-Shabaab ayaa bilihii ugu dambeeyey wadey dadaalo ay isugu soo dhoweyneyso maamulada iyo dowlada Fedraalka iyadoo sugeysay dhisamaha maamulka cusub ee Galmudug.

Intii MOL aan ku guda jirnay uruurinta macluumaadkan, waxay dowladda Mareykanka ay soo saartey war-qoraal ah [Halkan ka akhri], oo ay ugu baaqayso madaxda shanka maamul goboleed iyo dowladda Federaalka inay dib usoo celiyaan wadashaqeyntii ka dhaxaysay, islamarkaana ay iska-kaashadaan amniga, la dagaalanka Al-Shabaab iyo siyaasad loo dhan yahay, si dalka uga dhacdo doorasho xor iyo xalaal ah.

Waxay dowladda Mareykanka sidoo kale ku baaqday dib u heshiisiin iyo inay madaxda Villa Soomaaliya ee waqtiga kasii dhamaanayo iyo kuwa maamullada isagu yimaadaan kulan bilaha nagu soo wajahan.Qoraalka Safaaradda ayaa ka muuqday inuu isbedel ku yimid mowqifkii hore ee dowladda Mareykanka ee ku wajahnaa maamulka Jubaland, iyadoo hadda loogu yaarey Axmed Madoobe Madaxweyne, halka markii hore hogaamiye ku tilmaami jirtay.

Dowladda Federaalka oo horey u diiday inay la shaqeyso maamulka hadda ka jira Jubaland, ayaa wararka hoose ee uu helayo MOL sheegaya in ay soo saari doonto war-saxaafadeed Axmed Madoobe Madaxweyni ugu yeeri doonto, shirka la filayana ay ku casuunto kadib cadaadis Mareykanka.

Mareykanka oo tageero ciidan siiya ciidanka Soomaaliya ayaa dagaal kula jiraa kooxda Al-shabaab, oo dhowaan weerartey saldhig ciidankiisa ku leeyihiin degaanka Manda Bay, gobolka Lamu ee dalka Kenya.

Gudaha Soomaaliya, Mareykanka waxaa ka jooga ciidamo, qaarkood ka howlgala Jubaland, waxaana khilaafka siyaasadeed ee madaxda Villa Soomaaliya iyo maamullada u arkaa inuu curyaaminayo howlgalka la-dagaalka argagaxisadda [counter-terrorism operations].

Facebook Notice for EU! You need to login to view and post FB Comments!