Madaxda Ugu Sarreysa Howlgalka Midowga Afrika Ee Amisom Oo Kulmay

Reading Time: < 1 minute

Madaxda ugu sarreysa Howlgalka Midowga Afrika ee AMISOM ayaa sheegay in ay dib u eegis ku sameynayaan shaqada Howlgalka.

Kulanka ayaa intiisa badan diiradda lagu saarayaa qeybta howlgallada dhinaca amaanka ee AMISOM,waxaana uu gogol dhig u yahay shir dhamaadka bishan ka furmaya Muqdisho oo ay yeelanayaan Madaxda AMISOM iyo daneeyayaashooduba.

Waxyaabaha kale ee xoogga lagu saarayo kulanka oo ka socda Muqdisho waxaa ka mid ah fulinta qorshaha kala guurka ee ay AMISOM dalka uga baxayaan.

Taliyaha Guud ee Ciidanka AMISOM Gen. Jim Beesigye Owoyesigire,ayaa sheegay in shirkani uu ku soo aaaday xilli xasaasi ah oo ay Midowga Afrika,Qaramada Midoobey iyo Dowladda Federaalka ah ee Soomaaliya isku raaceen qorshaha ka bixitaanka AMISOM ee Soomaaliya.

Madax howlgalka AMISOM, Francisco Madeira, ayaa ugu baaqay taliyayaasha shanta qeybood ee howlgalka AMISOM in ay isu yimaadaan islamarkaana isla meel dhigaan qorshe si kama dambeys ah looga adkaan karo Al-shabaab.

Waxaa uu sheegay in sida kaliya ee Dowladda Federaalka ah loogu wareejin karo amaanka dalkeeda ay tahay in marka hore lagala shaqeeyo dhismaha ciidan ku filan sidoo kalena laga gacansiiyo dagaalka ka dhanka ah AL-shabaab.