Fatahaado xooggan oo geystay khasaare nafeed oo-ka-dhacay-Beledweyne

Reading Time: < 1 minute

Magaalada Beledweyne ee xarunta gobolka Hiiraan ayaa waxaa ka dhacay fatahaado xooggan oo geystay khasaare nafeed iyo mid hantiyeed, sidoo kale kumanaan qof oo ku dhaqan magaalada ayaa ka barakacay.

Biyaha ayaa gabi ahaanba magaalada qarqiyay oo joojiyay dhaqdhaqaaqii dadka, waxayna arrintaasi saameyn ku yeelatay nolosha qoysaska ku tiirsan shaqooyinka farsamada iyo wixii la halmaala oo lagu kaafiyo nolol maalmeedka.

Kumanaan ka mid ah dadkii ku noolaa magaalada ayaa barakacay, kuwa harayna waxay tageen saqafka sare ee daaraha dhaadheer si ay uga badbaadaan fatahaadda, kuwaasoo heerarkoodu aad sare ugu kacay.

Dadka ku barakacay magaalada bannaankeeda ayaa la kulmaya dhibaatooyin kala duwan oo ay ugu weyn tahay cunno yari iyo la’aanta meel ay u hoyadaan oo ay uga badbaadaan fallaaraha cadceedda.

Guddoomiyaha Maamulka Gobolka Hiiraan, Cabdullaahi Axmed Maalin Sufurow, ayaa ka hadlay dhibaatada ka dhalatay fatahaadda Wabiga Shabelle ee Magaalada Beledweyn iyo khasaaraha ka dhashay.

Gudoomiyaha oo xaqiijiyay dhimashada 15 qof, ayaa yiri:

“Hadda quus aan gaarnay, Magaalada Beledweyn Qariyo la Halaagay bay isugu badashay, waa laga kala guuray, dhibaatada ay shacabka magaalada la kumayaan waa in la gaarsiiyaa Caalamka”.

Roobabka ka dhashay xaaladda El Niño ayaa sababay in biyaha webiga Shabeelle & Jubba ay sare u kacaan, taasoo keentay fatahaado ku dhuftay tuulooyin badan oo ka tirsan gobollada Hiiraan, Shabeellooyinka, Jubbooyinka iyo Gedo.