Golaha Wakiilada Somaliland oo Canbareyay Goanka Baarlamanka Soomaaliya Ay Ku Ceyriyen DP World

Golaha wakiilada Somaliland ayaa kulan ay maanta ku yeesheen magaalada Hargeysa waxay ku cambaareeyeen go’aankii shalay ee baarlamaanka federaalka Soomaaaliya dalka kaga eryey shirkadda DP World.

“Wuxuu golaha wakiilladu si buuxda u cambaareynayaa go’aankii gardarrada iyo sharcidarrada ahaa ee Golaha Shacabka ee dowladda Soomaaliya ka soo saaray dekadda Berbera, sidoo kale, wuxuu Goluhu si xooggan u cambaareynayaa faragelinta qaawan ee ay dowladda Soomaaliya ku hayso madaxbannaanida iyo qarannimada Somaliland” ayaa lagu yiri qoraal ka soo baxay Golaha Wakiillada Somaliland.

“Goluhu isagoo gudanaya waajibaadkiisa dastuuriga ah, wuxuu si buuxda u ayidayaa maalgashiga khayraadka dabiiciga ah iyo kaabayaasha dhaqaalaha ee dalka, si loo xaqiijiyo kobcinta dhaqaalaha, shaqo-abuurista iyo nolosha bulshada guud ahaan” ayaa sidoo kale qoraalkan lagu yiri.

Ugu dambeyn, waxay xildhibaannada Somaliland u sheegeen beesha caalamka in dowladda federaalka Soomaaliya dhaqdhaqaaqyada ay waddo keeni karaan xasilooni darro cusub.